Ijumaa, 19 Agosti 2016

MAZISHI YA BI SHAKILA , YATAFANYIKA LEO MBAGALA CHARAMBE

Mazishi ya Bi Shakila yatakuwa leo Jumamosi 20 AGOSTI 2016. Mbagala Charambe, saa kumi alasiri Uwanja wa Ninja.
 Namna ya kufika msibani nyumbani kwa marehemu kwa kutumia daladala. Unapanda magari ya Mbagala Rangi Tatu, ukifika mwisho unachukua basi la Nzasa na unashuka Mnara wa Voda hapo unauliza kwa Bi Shakila utaonyeshwa

Jumapili, 7 Agosti 2016

LEO TUNATIMIZA MIAKA 12 TOKA KIFO CHA PATRICK BALISDYA


Jina Patrick Balisdya halitakuwa geni kabisa kwa wadau wa blog hii,lazima roho zimeanza kuwadunda kama inavyokuwa kwangu kila nikimkumbuka Blai. Patrick Pama Balisidya alizaliwa Mvumi Dodoma tarehe 18 April 1946. Kabila lake alikuwa Mgogo , kabila ambalo lina wanamuziki wengi maarufu kutokana na muziki kuwa sehemu muhimu ya maisha ya kabila hilo. Mama yake alikuwa anapiga kinanda kanisani na hivyo basi kutokana na asili ya kabila lake na pia kutokana na mama yake, hakika huyu angeweza kujisifu kuwa muziki uko katika damu yake. Mdau mmoja alitutaarifu kuwa Balisidya alikuwa kiongozi wa Bendi ya shuleni kwake Dodoma secondary School. Ambapo kutoka hapo alijiunga na Chuo cha Ufundi , na baada ya kumaliza mafunzo alifanya kazi hiyo kwa muda na 1967 akawa tayari anapiga muziki Dar Es Salaam Jazz B. Kufikia mwaka 1970 Patrick alikuwa ameanzisha kikosi chake mwenyewe Afro70, kikiwa na mtindo wake Afrosa. Alikuwa mbunifu katika muziki wake, na kwa muda mrefu alikwepa sana kuingia katika wimbi la kufuata mapigo ya Kikongo kitu ambacho hata wakati huo bendi nyingi zilikifanya, japokuwa kukutana na Franco wakati alipofanya moja ya ziara zake nchini humu kulimfanya abadili mtindo kwa kipindi kifupi na katika nyimbo moja wapo aliiga kabisa solo la Franco alilolipiga kwenye wimbo wake Georgette. Afro70 iliwakilisha wanamuziki wa Tanzania katika maonyesho ya mtu mweusi Lagos, Nigeria. (FESTAC festival 1977). Vyombo alivyotumia katika maonyesho haya vilimsumbua akili mpaka alipofariki, kwani muda mchache kabla ya Festac, wakati huo serikali ikiwa imeshamtaarifu kuwa ndie atakuwa mwakilishi wa Tanzania, vyombo vyake vyote vilihalibika katika ajali ya gari. Serikali ilikuwa imenunua vyombo vipya kwa ajili ya bendi yake ya Wizara ya Utamaduni wakati huo, ambavyo siku zote Balisdya alisema aliambiwa ni vyake baada ya maonyesho. Aliporudi kutoka Nigeria Kiongozi mwingine wa serikali aliamuliwa arudishe hivyo vyombo virudishwe serikalini na kwa kitendo kile kutangaza kifo cha Afro70. Vyombo hivyo vilitumika kuanzisha bendi ya Asilia Jazz ambayo ilikuwa Bendi ya Wizara ya Utamaduni na Vijana. Balisdya alitumia muda mwingi kujaribu kudai haki yake hiyo ambayo ilimkwepa mpaka mwisho wa maisha. Mwaka 1979, Balisidya alikwenda Sweden na kushirikiana na kikundi cha Archimedes akatoa album nzuri sana iliyoitwa Bado Kidogo. Kuna wakati Patrick alijiunga na Orchestre Safari Sound, (masantula) na kupiga piano katika ule wimbo maarufu, ‘Unambie siri’, Patrick pia alikuwa mpigaji mahiri wa keyboards. Kwa kweli nyimbo za Patrick zilizokuwa juu katika chati ni nyingi. Harusi, Dirishani, Weekend, Tausi, Pesa, Nakupenda kama Lulu, Ni mashaka na mahangaiko, Afrika. Patrick alifariki tarehe 7, Agosti 2004 na kuzikwa 12 Aug katika makaburi ya Buguruni Malapa. Daima tutakukumbuka Patrick Pama Balisidya, Mungu akulaze pema peponi


NI MIAKA 46 TOKA KIFO CHA BAVON MARIE MARIE






Bavon Marie Marie, mdogo wake Franco Luambo,
alizaliwa May 27, 1944 katika jiji la Kinshasa na kupewa jina la Siango Bavon Marie Marie. Alipokuwa mdogo hakuwa mtukutu lakini alikuwa na akili sana, akajulikana sana kwenye eneo alilokulia   wilaya ya Bosobolo. Kadri alivyokuwa akaanza kuishi maisha ya  makeke zaidi kwa kuwa mlevi mzuri wa pombe na msafi aliyechichumbua kisawasawa kama ilivyokuwa desturi ya vijana wa Kinshasa wakati ule. Kama alivyokuwa kaka yake Franco Makiadi naye alikuwa mpiga gitaa mzuri sana. Alipigia bendi kama Cubana Jazz akiwa na mwanamuziki Bumba Massa, akapigia Orchestre Jamel kabla ya kuingia Negro Succes, bendi ambayo ilianzishwa 1960 za Vicky Longomba (Baba wa Awilo Longomba). Vicky aliwahi kuwa mmoja wa wanamuziki wa TP OK Jazz, sasa yeye  pamoja na wenzie Leon’ Bholen’ Bombolo, na mwimbaji mwenzie Hubert ‘Djeskin’Dihunga, mpiga sax Andre Menga, rhythm Jean Dinos, mpiga bezi Alphonse ‘Le Brun’ Epayo, mpiga drum Sammy Kiadaka na mwimbaji mwingine Gaspard ‘Gaspy; Luwowo wakaanzisha hiyo bendi kali kabisa  Negro Succes . Bavon akawa mpiga gitaa wa bendi hii baada ya mwaka 1965, yeye na mwenzie Bholen wakawa viongozi na masupastar wa wakati huo kwa vijana wa Kinshasa. Pamoja na kuwa kaka yake Franco  ndie aliyekuwa akijulikana kama Mwalimu Mkuu wa Rhumba la Kongo yeye pia alikuwa kipenzi  vijana kutokana na upigaji wa solo lake lililokuwa na uchangamfu zaidi .



Tarehe 5 Agost 1970 Bavon Marie alifariki katika ajali ya gari baada ya ugomvi uliotokana na mpenzi wa Bavon aliyeitwa Lucy, ambapo Bavon alimshutumu kaka yake kuwa kalala na mpenzi wake huyo. Ajali hiyo ilisababisha Lucy akatike miguu. Kuna watu wengine wanasema kisa kilikuwa ni ulevi tu wa Bavon ulisababisha bendi yake ishindwe kufanya show nae akawa kakasirika kwa hilo na kuendesha gari kwa fujo na kuishia chini ya uvungu wa roli kwenye njia panda. Pamoja na upigaji wa gitaa Bavon pia alikuwa mtunzi mzuri sana wa mashahiri ambayo yaliwagusa watu. Kwa mfano wimbo wake wa 'Mwana 15 Ans'…Mtoto wa miaka 15, Bavon aliongea kama binti wa miaka 15 ambae ana uchungu kwa kuwa familia yake inamtafutia mchumba japo yeye anataka kwenda shule. Hadithi ambayo wote tutakubali mpaka leo inamaana sana katika jamii za Kiafrika

Jumatano, 3 Agosti 2016

TODAY I WOKE UP WITH THE SONG KWA MJOMBA BY URAFIKI JAZZ BAND


I woke up today with a 1970s Urafiki Jazz Band's tune Kwa Mjomba singing in my brain. The song was composed by Frank Masamba who was a vocalist then but now a saxaphonist and also teaches saxophone. The lyrics of this song  talk about this young guy who visited his uncle and met his beautiful cousin and fell in love with her, but was told he could not marry his cousin but wait for any other girl and someday will fall in love again. The song was very popular during its days, and is still being aired in some radio programs to date. Here are the lyrics;
Nilipokwenda kwa mjomba, Nilikutana na binamu yangu,
Na kwa kweli tulipendana, wazazi wetu walitukatalia tusioane
Eti kwa sababu yeye ni mtoto wa mjomba,
Ndivyo ilivyokuwa vigumu kwetu kufunga ndoa
Nilipokwenda kwa mjomba, Nilikutana na binamu yangu,
Na kwa kweli tulipendana, wazazi wetu walitukatalia tusioane
Eti kwa sababu yeye ni mtoto wa mjomba,
Ndivyo ilivyokuwa vigumu kwetu kufunga ndoa

       Chorus
Wazazi ninansema nasononeka, kwa vile msichana nilimpenda
Basi mwanangu nakuomba usisikitike sana , tuliza roho dunia hii ni pana sana kijana
Wazazi ninansema nasononeka, kwa vile msichana nilimpenda
Utampata wako mwingine pia utampenda, mtoto wa mjomba kweli kuoana si vizuri

Wazazi ninansema nasononeka, kwa vile msichana nilimpenda
Basi mwanangu nakuomba usisikitike sana , tuliza roho dunia hii ni pana sana kijana
Wazazi ninansema nasononeka, kwa vile msichana nilimpenda
Utampata wako mwingine pia utampenda, mtoto wa mjomba kweli kuoana si vizuri

The bands style was 'Mchakachaka' but fondly named 'Chakachua'. The word has changed its meaning now mostly because politicians have made it famous making it mean hoodwinking.  Urafiki Jazz Band was formed in 1970. It was owned by a textile mill known then as  FRIENDSHIP TEXTILE MILL. The company was so named as a sign of friendship between Tanzania and China. It was the Chinese who built the mill.The bands main purpose was to advertise the Khanga and Vitenge products that were being manufactured by the mill. At the time there was stiff competition from other textile mills like Mwatex , Kiltex, Mutex, and so on. The then General Manager of the mill, Mr Joseph Rwegasira (late) dished out 50,000/- which was enough to buy a set of music instruments from Dar es Salaam Music House. The shop is still in business to date. The company management engaged Mr Juma Feruzi Mrisho aka Ngulimba wa Ngulimba a veteran vocalist to come up with a band. Ngulimba took 5 musicians from the band he had just left, African Quilado and they became the core of the new band. He brought in  Michael Vincent Semgumi a lead guitarist, to date one of the best lead guitarists Tanzania has ever come up with, Ayoub Iddi Dhahabu on the bass guitar, Abassi Saidi Nyanga,Tenor Sax, Fida Saidi on Alto Sax. Other musicians were already employees of the company, like Juma Ramadhani Lidenge on the Second Solo guitar, Mohamed Bakari Churchil on rhythm guitar, Ezekiel Mazanda also a  rhythm guitarist, Abassi Lulela another bass guitarist, Hamisi Nguru, Mussa Kitumbo, Cleaver Ulanda all being vocalists, Maarifa Ramadhani on the congas, Juma Saidi on maraccass and Hamisi Mashala playing the drums . That was the firs line up of Urafiki Jazz Band. The band began with its 'Mchakamchaka' style later on changed to 'chakachua' and in its last day in the 80s went on to ‘Pasua’ and lastly ‘Patashika’. Many musicians joined and left this band other famous names of the time include Gideon Banda the saxophonist from  Morogoro Jazz, Thobias Cosmas Chidumule still famous vocalist who has now turned to gospel music, who together with Frank Mahulu joined the group coming from another great group The Western Jazz Band that was sometimes in 1973. Mkali and Hidaya,Trumpet blowers from the nearby town Morogoro accompanied by Ali Saidi, a rythm guitarist from Cuban Marimba, joined the band and in 1975 Mganga Hemedi a rythm guitarist from Atomic jazz band of Tanga joined this great group. Urafiki Jazz Band recorded more than three hundred songs covering subject like love, politics and everyday life in Tanzania at the time. A number of its songs are still being aired and some groups have even recorded their version of the songs. In
1975 the band took part in a Band competition which was held at Mnazi Mmoja Grounds and came third, this gave a ticket to the Band leader Ngulimba to travel with the band that won ( Afro 70 Band) to Lagos for the FESTAC festival held that year.

Alhamisi, 28 Julai 2016

URAFIKI JAZZ BAND NYIMBO ZAKE APATA UHAI MPYA



Leo nimeamka na wimbo wa Kwa Mjomba wa Urafiki Jazz Band, wimbo huo ni utunzi wa Frank Masamba ambaye kwa sasa ni mpiga saksafon na mwalimu wa chombo hicho;
Nilipokwenda kwa mjomba, Nilikutana na binamu yangu,
Na kwa kweli tulipendana, wazazi wetu walitukatalia tusioane
Eti kwa sababu yeye ni mtoto wa mjomba,
Ndivyo ilivyokuwa vigumu kwetu kufunga ndoa
Nilipokwenda kwa mjomba, Nilikutana na binamu yangu,
Na kwa kweli tulipendana, wazazi wetu walitukatalia tusioane
Eti kwa sababu yeye ni mtoto wa mjomba,
Ndivyo ilivyokuwa vigumu kwetu kufunga ndoa

       Chorus
Wazazi ninansema nasononeka, kwa vile msichana nilimpenda
Basi mwanangu nakuomba usisikitike sana , tuliza roho dunia hii ni pana sana kijana
Wazazi ninansema nasononeka, kwa vile msichana nilimpenda
Utampata wako mwingine pia utampenda, mtoto wa mjomba kweli kuoana si vizuri

Wazazi ninansema nasononeka, kwa vile msichana nilimpenda
Basi mwanangu nakuomba usisikitike sana , tuliza roho dunia hii ni pana sana kijana
Wazazi ninansema nasononeka, kwa vile msichana nilimpenda
Utampata wako mwingine pia utampenda, mtoto wa mjomba kweli kuoana si vizuri

Katika  zama hizi ukisikia neno ‘kuchakachua’ maana yake huwa kufanya jambo ambalo si halali au sahihi. Lakini neno ‘Chakachua’ katika miaka ya 70 na 80 lilikuwa na maana ya mtindo wa bendi maarufu wakati huo, na neno hilo lilitokana na mtindo wa bendi hiyo iliyokuwa inapiga mtindo iliyouita Mchakamchaka, neno lililofupishwa na wanamuziki wa bendi hii na kuitwa ‘Chaka Chuwa’. Bendi hii iliitwa Urafiki Jazz Band. Bendi hii  ilianzishwa mwaka 1970 ikiwa inamilikiwa na  kiwanda cha nguo cha Urafiki kilichokuwa Ubungo. Jina rasmi la kiwanda hicho lilikuwa ni FRIENDSHIP TEXTILE MILL. Kiwanda kilijengwa kwa msaada wa watu wa Jamhuri ya China na kwa urafiki huo kilipewa jina la Friendship Textile. Bendi ilianzishwa ili kutangaza bidhaa hasa Khanga na Vitenge za kiwanda hiki kwani wakati huo kulikuwa na viwanda vingine kadhaa vya nguo nchini kama vile Mwatex, Mutex, Kiltex, na kadhalika. Meneja Mkuu wa kiwanda cha Urafiki Bw. Joseph Rwegasira aliubariki mpango huo wa kuanzishwa bendi ya dansi ya kiwanda na hivyo aliidhinisha malipo ya hundi ya Shs. 50,000/= kununulia seti ya vyombo vya muziki kutoka katika duka la Dar Es Salaam Music House ambalo mpaka leo lipo katika mtaa wa Samora Avenue Dar Es Salaam.
Uongozi wa kiwanda ulimuajiri muimbaji Juma Mrisho Feruzi aliyekuwa maarufu kwa jina la Ngulimba wa Ngulimba na kumpa jukumu la kutafuta wanamuziki kwa ajili ya bendi hii. Ngulimba alichukua wapigaji watano kutoka Orchestre African Qillado, bendi ambayo aliipigia kabla ya kujiunga na Urafiki. Wanamuziki aliowachukua walikuwa ni Michael Vincent Semgumi mpiga gitaa la Solo, Ayoub Iddi Dhahabu mpiga gitaa zito la Bass, Abassi Saidi Nyanga mpulizaji wa Tenor Saxophone na Fida Saidi mpulizaji wa  Alto Saxophone. Wanamuziki wengine walikuwa  tayari waajiriwa wa kiwanda cha Urafiki  kama vile Juma Ramadhani Lidenge mpiga gitaa la Second Solo, Mohamed Bakari Churchil aliyepiga gitaa la rhythm, Ezekiel Mazanda pia alipiga rhythm, Abassi Lulela  kwenye Besi, Hamisi Nguru  Muimbaji, Mussa Kitumbo  Muimbaji, Cleaver Ulanda  Muimbaji, Maarifa Ramadhani kwenye Tumba, Juma Saidi mpiga maraccass na Hamisi Mashala  mpiga drums. Hilo ndilo lilikuwa kundi la kwanza la Urafiki Jazz Band. Mtindo walioanza nao Urafiki ulijulikana ‘Mchaka Mchaka’ na baadae ukabadilika na kuwa ‘Chaka Chua’ na hatimae wakati bendi inaelekea ukingoni mwa uhai wake walipiga mtindo wa ‘Pasua’ na ‘Patashika’.
Katika uhai wake  bendi ya Urafiki ilipitiwa na wanamuziki wengi waliokuwa maarufu wakati huo na wengine kuja kuwa maarufu baadae,  wakiwemo Gideon Banda mpuliza saxophone kutoka Morogoro Jazz, Thobias Cosmas Chidumule na Frank Mahulu ambao walikuwa  waimbaji waliotokea Western Jazz waliingia mwaka 1973 na kuongeza nguvu katika safu ya uimbaji. Baadae wapiga trampeti Mkali na Hidaya kutoka Morogoro walijiunga wakifuatana na Ali Saidi alietokea Cuban Marimba akipiga gitaa la kati (rhythm) na baadae mwaka 1975, Mganga Hemedi kutoka Tanga, akitokea Atomic Jazz, nae alijiunga na kuwa upande wa solo na rhythm.

Urafiki Jazz Band ilirekodi nyimbo zaidi ya  mia tatu zilizoelezea siasa, mapenzi, nasaha na mafundisho na pia kukosoa. Baadhi ya nyimbo zake za siasa zilizopata umaarufu ni kama zile Mwenyekiti Nyerere, Mauaji ya Soweto, Jembe na Panga na kadhalika.
Mwaka 1975 Bendi ilishiriki katika mashindano ya bendi za muziki wa dansi yaliyofanyika kwenye viwanja vya Mnazi Mmoja,  Dar Es Salaam na kushika nafasi ya tatu, hili lilimuwezesha Juma Mrisho Ngulimba wa Ngulimba, kama Kiongozi wa Urafiki kupata nafasi ya kusindikizana na bendi ya Afro 70 kwenda Nigeria kwenye maonyesho ya mtu mweusi yaliyofanyika huko. Urafiki Jazz band haipo tena lakini hakika nyimbo zake bado zinapendwa na kuna vikundi vya vijana vimeanza kurudia nyimbo hizo kwa staili mpya, na hata tungo zake nyingine zikisikika katika mtindo wa taarab. Makala hii niliitoa kwama mara ya kwanza katika gazeti la MWANANCHI JUMAMOSI, na kila Jumamosi usikose makala kama hizi

Jumanne, 19 Julai 2016

BAVON MDOGO WAKE FRANCO LUAMBO LWANZO



Ganda la Album iliyokuwa na wimbo Maseke ya Meme. Tshimanga Assossa  aliwa wa pili toka kulia
Wimbo Maseke ya Meme ulipigwa katika miaka ya 70 na bendi maarufu ya Negro Success. Kundi lililokuwa likiongozwa na mdogo wake Franco Luambo Luanzo Makiadi, nae si mwingine ila ni mpiga solo mkali Bavon Siongo au maarufu kama Bavon Marie Marie aliyezaliwa May 27, 1944 ambaye pia alitunga wimbo huu marufu. Wimbo huu Maseke ya Meme au kwa Kiswahili ‘Pembe za kondoo’ ulianza kusambazwa March 1970. Mashahiri ya wimbo huu yalileta utata sana baada ya kifo cha Bavon Marie Marie kilichotokea muda si mrefu baada ya wimbo huu kutoka hewani.  Sehemu ya mashahiri ya wimbo huu yalisema hivi;
Bavon Marie Marie
 Nalilia maisha yangu
Sijachoka kuishi
Lakini wanataka nitangulie
Naacha kuongea
Nasubiri kifo.
Bahati mbaya sana Agosti 5, 1970, siku ya Jumatano, Bavon Marie Marie akakumbwa na ajali ya gari iliyosababisha kifo chake katika mtaa wa Avenue Kasavubu, mjini Kinshasa. Wimbo ule ukaonekana kama ni utabiri wa kifo chake mwenyewe. Kwa vile Franco hakufurahia mdogo wake kuingia katika muziki,watu wakatafsiri kuwa alikuwa amemloga mdogo wake ambae alifariki akiwa na umri wa miaka 34 tu. Kuna hadithi nyingine inayosema kifo cha Bavon kilitokea muda mfupi baada ya ugomvi na kaka yake kwa kisa kuwa Franco alikuwa ametembea na Lucy aliyekuwa bibi wa Bavon. Inasemekana Bavon aliondoka spidi na gari akiwa na hasira na muda mchache baadae akaaingia chini ya lori.
Kuna nyimbo nyingi duniani ambazo watu hudhani ni kama utabiri wa wanamuziki kabla ya kufa. Wimbo Ee Mola wangu wa Salum Abdallah wa Cuban Marimba ni mfano mojawapo. Kuna wanamuziki wengi wanaogopa kuimba au kutunga nyimbo kuhusu kifo kwa imani kuwa ukitunga wimbo wa namna hiyo unaita kifo.

Jumatatu, 30 Mei 2016

BENDI ZA SHULE ZA SEKONDARI


Leo nimeamka na wimbo uliopigwa mwaka 1969, na Mkwawa Jazz Band katika mtindo wao wa Ligija. Maneno ya wimbo huo yalikuwa kama ifuatavyo;
Huenda hasa utaijua shida niliyopata nilipokupenda
Ulisema hali yangu duni leo wanipendaje na wewe almasi,
Kwa kweli sina msamaha na sasa sahau kuwa bado naishi
Wamekwisha kuacha walo bora
Ohh uliniona chura ondoka
Usinijue sana nishaponda  ohh niseme lugha gani changanya
Tafadhali jifiche nisikuone, naenda ita konstebo kimbia
Utapendaje chura na wewe lulu
Na mimi sasa ghali ohh
Bendi hii ilikuwa moja ya bendi mbili za wanafunzi waliokuwa wakisoma Mkwawa High School kati ya mwaka 1969 na 1971. Kila Jumapili mchana bendi hizi mbili ziliporomosha muziki katika mfumo uliojulikana kama bugi, katika ukumbi wa Community Center pale Iringa. Bugi lilikuwa dansi lililoruhusu wanafunzi na watoto wadogo kufaidi dansi. Dansi lilianza saa nane mchana na kibali cha bugi kiliisha saa kumi na mbili kamili, pombe zilikuwa marufuku wakati wa bugi. Katika miaka hiyo shule za sekondari nyingi zilikuwa na bendi na bendi hizi nyingine zilikuja kuwa maarufu na hata kuja kutoa wanamuziki maarufu sana. Na kwa kuwa kulikuwa na utaratibu mzuri wanafunzi wengi waliokuwa wanamuziki wakati huo walikuja kuendelea na kuwa watu muhimu katika nyanja mbalimbali kitaifa. Kwa mfano katika bendi hiyo ya Mkwawa iliyoimba na hata baadae kurekodi wimbo wangu wa leo, wanamuziki wake woye walikuja kuwa watu wenye nafasi muhimu Kitaifa. Mpiga solo Sewando alikuja kuwa mwalimu  wa ‘electronics’ chuo kikuu cha Dar es Salaam, na pia ndie alikuja kuwa mwanzilishi wa bendi ya TZ Brothers. Sewando ambaye mwanae sasa ni producer maarufu wa muziki wa ‘kizazi kipya’, alianza muziki akiwa Kwiro Secondary ambako nako kulikuwa na bendi iliyowahi kurekodi nyimbo maarufu wakati huo, na hata kuwa chanzo cha baadhi ya mitindo iliyotumiwa na Morogoro Jazz band. Sewando alianza kupenda electronics wakati huo, na kuwa fundi wa vyombo vya bendi yake ya shule kiasi cha kupata jina la ‘The Mad Scientist’. Masanja alikuwa mpiga rhythm wakati huo na hatimae alikuja kuwa rubani wa ndege. John Mkama aliyepiga bezi alikuja kuwa mwandishi wa habari mahiri. Manji aliyepiga rhythm pia alikuja kuwa mhandisi wa ndege, na miaka mchache iliyopita alianzisha bendi iliyoitwa Chikoike Sound, na kwa sasa ana shule nzuri ya muziki Tabata, Dar es Salaam wakati muimbaji Danford Mpumilwa ni mwandishi maarufu, nae pia ndie alikuwa mwanzilishi wa bendi ya Serengeti ya Arusha. Mpiga tumba katika wimbo huo ni kiongozi maarufu wa dini mwenye wadhifa wa Askofu Mkuu. Hivyo kushiriki katika muziki hakukuwafanya wanamuziki hawa waishie kuwa wahuni au walevi walioharibikiwa kimaisha au kushindwa kuendelea ma masomo. Bendi ya pili ya Mkwawa Secondary ilikuwa ikipiga muziki wa kizungu na hasa wa mtindo wa soul. Bendi hii iliitwa  ‘The Midnight Movers’ ikiwa na wanamuziki kama Kafumba, Martin Mhando. Hans Poppe, Deo Ishengoma, amboa waliohai ni watu wenye nyadhifa muhimu katika jamii. Kuwa mwanamuziki hakukuwa tiketi ya kuwa muhuni. Kama nilivyosema shule nyingi za sekondari zilikuwa na bendi, pale Dodoma Secondary kulikuwa na bendi kiongozi wa bendi hii alikuwa Patrick Balisidya aliyekuja kuwa mwanamuziki maarufu alipokuja kuanzisha Afro 70.
Pale Azania Secondary School, kati ya mwaka 1966 hadi 1969, kulikuwa na kundi lililoitwa ‘The Blues’ ambalo lilikuwa likifundishwa na mwalimu wa muziki Martin Longfellow Mugalula ambaye baadae alihamia Finland na huko kutoa nyimbo kadhaa. Kundi hili lilikuwa likienda kupiga sehemu ambazo Kilwa Jazz walikuwa wakipiga hasa kutegea wakati Kilwa Jazz wamepumzika. Bendi kubwa zamani zilikuwa na kawaida ya kupumziki nusu saa katikati ya onyesho na wakati huo bendi ndogo zilipztz nafasi nafasi ya kupanda na kupiga muziki wao. Utaratibu huu ulijulikana kama kupara ‘kijiko’. Kati ya wanamuziki wa bendi hii ya The Blues, mmoja alikuja kuwa mwalimu shule ya Al Muntazir Upanga Dar es Salaam. Mazengo High School huko Dodoma nako kulikuwa na bendi, Jengo kwenye Microphone, marehemu Profesa  Wagao akipiga bezi Kime kwenye solo na  Balozi Tsere akipiga gitaa la rythm. Bendi hii ilichukua vyombo vibovu vya Central Jazz Band ambayo wakati huo ilikuwa imekufa na kuvikarabati katika maabara ya shule na kuanza kuvitumia. Shule zilikuwa na utaratibu ulioitwa Social Evening, katika utaratibu huu shule moja hualika shule nyingine mara nyingi shule ya wavulana ilialika shule ya wasichana kwa ajili ya dansi, na wakati huo record player zilizotumia sahani za santuri ndizo zilizotumika kutoa muziki. Katika social evening moja hapo Mazengo Secondary, Social Prefect hakupenda bendi hiyo ya wanafunzi ipige muziki, wanabendi walibembeleza na kuomba kupiga wimbo mmoja tu, kwa shingo upande wakaruhusiwa, baada ya kupiga wimbo huo, wasichana wa Msalato waliokuwa wageni na wanafunzi wengine wa Mazengo hawakutaka tena kucheza muziki kutoka kwenye player. Bendi ikachukua nafasi yake. Moshi Secondary nako kulikuwa na bendi wakiwemo wanamuziki kama Joseph Mkwawa, mfamasia mashuhuri kule Arusha, Peregreen ambae anawadhifa mkubwa jeshini nao walikuwa wakipiga kwenye sherehe za pale shuleni na mara nyingine kushirikiana na bendi kama Bana Afrika Kituli na Zaire Success kwenye maonyesho ya bendi hizo, bendi zilizokuwa na masikani mjini Moshi zama hizo. Hakika kupiga muziki si uhuni, ikiwa mazingira mazuri ya kazi hiyo yameandaliwa. Kuna ushahidi wa kisayansi kuwa kupiga muziki husaidia kuchamngamsha matumizi ya ubongo na hivyo kumfanya mwanafunzi kuwa na maendeleo mazuri shuleni